gauez gau zain lodi orlegietako molekula bizkorrak,

esperantzaz eta kemen zintzoz hantuak nekadura handiak

bat-batean udalatu dizkit.

baserrian egoten naiz ur eskasez lehortzen diren belarren

artean erdi aroko ermita inspiratua iduri, kalitate

merkezko polizi nobelak irakurtzen, edo Leonard Cohenen

songs from a room entzuten.

arratsetako delirio beltzetan piztien begi gorrituegiak

gailurretako eremu haizetsuetan zartatzen, apurtzen,

errauts bihurtzen suma ditzazket.

loa, pertsona zuzen normalen loa ezin lortuz erre eta

erre aritzen naizelarik gau osoak egun argi zaizkit.

euriaren eta ilargiaren borroka gogorrak sor arazten

dituen iluneko ortzadar koloredunak ikusten ditut,

baina nehork ez nau sinesten, edo igelen oihu sinfonikoak

gerorako poesi materia gisa zinta higatuetan grabatzen,

diote burua galdua dudala.

ez dut adrenalinarik aski produzitzen estrategia zaharren

arabera atakatzen nauten konformismo lasaiaren armada

segurrei kolpeka erantzutcko,

bizitzaren flipper zaratsuan arras malestruka naiz.

partida frango pagatzen ditut baina beti score ttikiak

ardiesten: etsiturik nago eta flipper'ak madarikatzen

ditut ondarrean.

gero pentsatzen dut erreakziorik hoberena, nere kasu

debaldean negarrez hastea dela: saia eta saia ez zait

malko malerus bat ere ixurtzen. hamasei urtetan baino

altzeiruztatuago naiteke menturaz. orduan behintzat

erromantikua nintzen, orain ezer ez.

laino gainetako ezpazio zabatetan beldurrak, lotsak,

herabeak hegaldaka dantzari dabiltza arrano gosetiak

bezala.

elur egin dezala Tenereko mortuan...

izatea barnetik deskonposatu nahi dut, idealezko

ama mitologikoen sabelera itzuli, iragan garaietan

atzerago joan, ulertuko ditudan bizitzaren oinarrizko

mekanismo konplexuak isilune dorpe honetan

aurkitzearren.

afari gaitzak antolatzen dituzte auzo bereko lagunek

ilusioak saltsa gurintsuetan hurrupatzeko eta nik

kondenatuen azken porru salda iresten dut hertzeak

kalamitate bortitzen ondarkinetarik garbitzeko.

kaos kosmikoa nere mundua da. haragia hitz bilaka

dadila bi mila urte iraun duen bitxikeria hau hortan

akabatzeko.