MIREN YOLDI GOMEZEK

AHIZPAREN AMODIOAZ

-c-

Elkar maite zutela?

Maite zutela lar esatea litzateke.

Ezkondu egin ziren. Gizartearen legera

eta Jainkoaren aurrean.

Ahizpa haurdun, koinatua

haragitarako txekorra bezala.

«Gero gerokoak» esan zidan ahizpak

eztei egunean. «Gero dionak

bego dio» pentsatu nuen nik.

Eta han joan ginen denok

ama, loreak, oturuntza eta poz

ustela, poz dekretatua baino

ustelagorik ez dago eta.

Jotzen zuela? Ez dut uste.

Kerida zuela? Ez da nahikoa gizon

bi emakumetarako.

Eztei egun beretik

heldu ziren mugara

nola haziak porlan gainera.