Larrazkeneko haize hegoen hats epelen

bila ibiltzen naun

hire begien orlegitasunean.

oihan ilunenean galdurik

banengo bezala

deitzen haut sohako bakoitzean.

atzoko urradura hura pizten zaidanean

minez josirik nagoenean

hire begien orlegitasunean

bermatzen ditinat

humilazio guzien aurkako

iraun beharraren erro ankerrak.

bakardadea nekez jasaiten delako nekez

hi ere gaizki habil noiztenka.

karrikak mututzen dituen

beldur latzaren garaiean

galaxia osoaren tristura

irakur dezakenat

hire begien orlegitasunean.

gure amodio eskasaren zauri zabalak eta

munduko madarikatuen miseriak

biltzen ditun

behako ezti batean.

horregatik dinat hain maite

hire begien orlegitasunean

bakezko hitzen urtzea.