HEMEN - 1

Hemendik idazten dugu orain

Non guztiak biltzen dituen hemendik

Nonahiko hemen guztietarik

Paretetan idazten dugu itsasoan idazten dugu paretez itsasoz

ldazten dugu eta hilak egon behar genuke

Gertakizun dagoena idazten dugu

Kaleak dira liburu honen orriak

Hizkuntza berrian idatziak

lrakur ezazue torturatuen esperantoa

Gutun anonimoak gutun ageriak

Zigarroen ketan idazten dugu ohe abandonatuetan idazten dugu

Eta gure gorputzak eskaintzen dizkiogu idazteari

lrakur ezazue bularretan labanak hartu zuen plazerra

Dotore hegaldatzen dira estukak berriro

Eta beren arraultze espoletadunak elurtzen dizkigute «hobe zenukete errendaturik»

Baina randebu horretara ez goaz gu

Norbaitek karpeta bat zabalduz gure izena pronunziatzen duelarik

Autobusez aldatzen dugu hiru bat aldiz

Hemengoa idazten dugu nonahi

Galdu genituen adiskideei idazten dugu

Hilik dauden lagunei ulertzen ez gaituzten lagunei

Plaza hutsetan dugu ateoste guztietan dugu

ldazten plaza beteka dugu isiltasun beteka idazten

Maitasun konsigna debekatua

Orain artekoa idazten dugu gerora

Noiz guztiak hartzen dituen oraindik

Oraindik idazten dugu hemen