MUSAREN ALDE APUSTUETAN

Jimmy Foxx alkoholizaturik hil zen

auzo marjinal bateko

hotel-gelaska batean.

Beau Jack-ek zapatei distira ateratzen

amaitu zuen,

hain justu

hasi zeneko hartan.

dozenaka daude, ehundaka

gehiago, beharbada

milaka gehiago.

atleta baldin bazara

zaharkitzea da

den paturik eta gaiztoena.

beste batzuek ordezkatua izatea,

berriro ez entzutea

bibak eta

txaloak,

berriro ez izatea

ezaguna,

gizon zahar bat izatea besterik gabe

beste gizon zaharren

modukoa.

zure buruan ere ez

sinestea,

egunkari-zatien albumari errepaso egitea

orri

horituoi.

hor zaude

irribarretsu;

hor zaude,

gazte.

jendetzak

heroi berriak ditu.

jendetza sekula ez da

hiltzen,

sekula ez da

zaharkitzen

ordea jendetzak sarri du

ahazten.

orain ez du telefonoak

jotzen,

neska gazteak joanak

dira,

festa

amaitu egin da.