PISTOLAREN MINTZOA

Hitzak dakartza haizeak
basoaren aldetik;
hitz berberak errekak
behin eta berriro.
Su inguruan bilduta
inor ez da mintzo,
zai eta zai gogaitua
ze itxaropen?

Hitzak soberan daude
pistolak mintza bitez

Hiriko horma guztiak
iluntzerakoan
hitzez dira betetzen
ixil-ixilean.
So okerdun gizonek,
gor eta mutu,
zabortegi itzalak
ehortzen dituzte.

Hitzak soberan daude
Pistolak mintza bitez.

Hitzez kondenatua
Hitzez epaitua
Hitzez-hitz zigortua
Hitzez-hitz antzua.
Munduko hiztegi oro
ari da nigarrez,
aditzak beldurtuak
geldi-geldi daude.

Hitzak soberan daude
Pistolak mintza bitez.

© Xabier Montoia