(Aduna, 1956) filologoa da eta irakaskuntzan dihardu. Poesia ez ezik, gaztetxoentzako narragintza ere landua du hainbat titulutan: Egunez parke batean, Oporraldi bat baserrian, Ametsontzi, Bota ura, Neskatxa telepatikoa, Atea kox-kox, Jonas eta hozkailu beldurtia... Bi nobela argitaratu ditu genero berean, Hamabi galdera pianoari eta Helena eta arrastiria. Literatura unibertsaleko lan asko itzuli ditu. Haur eta Gazte alorreko Euskadi Saria jaso zuen 1999an.

Obra poetikoa
NOTRE-DAMEKO OIHARTZUNAK. Elkar, 1984
BIZITZAREKIN SOLASEAN. Elkar, 1989
BEGI-NINIAREN POEMAK. Erein, 1992
EGUN OSORAKO POEMAK ETA BESTE. Pamiela, 1993
SAREAN LEIHO. Alberdania, 1994
HAUR KORAPILOAK. Pamiela, 1997
KARTAPAZIOKO POEMAK. Ibaizabal, 1998 (Karlos Linazasororekin batera).
BOTOI BAT BEZALA. Anaya-Haritza, 1999
«Ezin hobeki frogatu digu Juan Kruz Igerabidek gaztetxoen psikologiak eta formazio mailak eskatzen dituzten parametroetan idazteak ez dakarrela kalterik kalitatean, baldin eta irizpide estetikoak hartzen badira gidari. Poesia honek eskatzen dituen maisutasun formal handiaren eta espiritu ernearen jabe, didaktismo orotarik urrun, seriosaren eta infantilaren arteko lotura zaila egin du, txinparta ikusgarritan, barrearen aldaera guztiak erakusten dizkigula. Plazer eta hausnarketa bihurtzen du hitzen jolasa Juan Kruz Igerabidek».

(Koldo Izagirreren sarreratik)