AURRESKU ETA ATZESKU

Urteak dituk

        Pernandoren egiak

        esaten ditudala,

        Atsularren arrazoiak

        ematen ditudala.

        Batzuk miresten hituen:

                Nor duzu hau

                hain argi

                hitzegiten diguna?

        Ezpain artean hartzen diat

        lehengo eta oraingo

        herriaren kantua:

        Etsepare zaharraren berso bihurria:

Ni katibu nadukana = Katiba da berzeren

Nadukana dadukana = Katibua da neure

Maitaleen arrazoiak = Desarrazoiak dire

Mila argudio zorrotz = Berdin lematen ere

        Edo Arrese berriagoaren berso zabala:

Jaiaterria salba dagian = Euskaldunaren kantuak

Aztu daiguzan etsaikeriak = Eta hasarre prontuak

Itzi daiguzan erdaldunentzat = Erdaldun diran kontuak

Jerta daiguzan gure arbolan = Faltatzen diran mentuak.

        Honelasen

        bete huen

        Garaziko

        dornua.

        Orain beste dornu

        berri bati

        hasi behar zioguk

        iraul-arazitzen.

        Zeren lehen

        fraka urdinak

        eta

        fraka gorriak

        hituen,

        Oinaz

        eta

        Ganboa,

        Agramondarrak

        eta

        Beamondarrak.

        Lehen

        hala;

        orain

        hola.

        Orain bonet ferdeak, zuriak eta

        gorriak.

        Lehen,

        Mikel Aingeru nafarra,

        fraka urdinak

        eta

        fraka gorriak.

        Lehen Nafarroa Beheretik

        Bizkai Garaira;

        orain

        Bizkai Beheretik

        Nafarroa Garaira:

Euskaldun guztiak izan gaiten anaia.

Euskaldun guztiak izan gaiten berdin.

Euskaldun guztiak izan gaiten libre.

        Heda dezagun

        euskal herri guztietatikan

        bonet urdin-Bergara bat,

        anaitasunaren eta borondatearen

        tzapel

        berria,

        esandakoa eta egindakoa

        estal dadin

        hola.

        Eta bien bitartean,

        anaia,

        Mikel Aingeru nafarra,

        har zak

        anaiaren eskua.

        Har zak,

        gure utopia honetan,

        gure ukronia honetan,

        har zak,

        orain,

        hemen,

        Mikel Aingeru Astiz

        nafarra,

        jakin behar duan oren eta lekuan,

        anaiaren eskua.

  © Gabriel Aresti