MOTORRAK HARILKATZEN
ez dut egundo ikusi horrelako atelierrik
esan zidan aitak gure aita zaharrak
zenbat erreminta!
mokorreko ebakuntzatik bere onera etorri zenean
kirofanoaz ari zitzaidan bistan da
hamabi urte bete zituenez geroztik
gisa guztietako lanabesak
baita hurkoa hiltzekoak ere erabilia zen gizona
ikaratu egin zela
ez zuen ulertuko ez nion esan ni ere
kirofanoan ilusioz beterik
osorik osatzeko asmo zintzoenarekin sartu nintzenean
kirofanoa baitzen hura
asindeton & soneto & etopeia apositoak
metonimia & diafora injekzioak
pleonasmoz & epinomez zorroztu zerrak
polisindeton & sinekdoke & anafora bertikal &
alexandrino & epanadiplosia tantaz tantakoak
paranomia & epifrasia & homeoteleutona bisturiak
damoklesen ezpata bana bailiran
(alderaketa kultu ohia, topiko arrunta)
paretetan zintzilik
gure buruetara buruz ikusirik (aliterazio merkea)
ikaratu egin nintzela
ihes egin nuela
eta handik harat ezikasien multzoan bizi izan naizela
bestelako lanbide bateko ofiziale
erreminta gutiren patroi hitzak eskuan hartu ahal izateko
legez kanpo aitor dut
ez titulurik ez titulua eskegitzeko bulegorik
zu bezala, aita
motorrak harilkatzen eremu magnetikoak sortzeko
(metafora egokia, ezta?)
© cc-by-sa Koldo Izagirre